Uned Adsefydlu Niwrolegol Arbenigol

Mae’r Uned Adsefydlu Niwrolegol Arbenigol yn wasanaeth rhanbarthol ar gyfer cleifion sydd ag anafiadau caffaeledig i’r ymennydd. Mae’r cleifion yn elwa o wasanaeth therapi galwedigaethol arbenigol iawn sy’n helpu’r rhai sydd ag anafiadau i’r ymennydd i fyw bywydau mor foddhaus ac annibynnol â phosib.

• Mae hyn yn cynnwys cleifion sydd ag:
• Anaf trawmatig i’r ymennydd
• Gwaedlif ar yr ymennydd
• Enseffalitis
• Anafiadau hypocsig i’r ymennydd
• Tiwmorau’r ymennydd
• Slerosis Ymledol.

Beth yw rôl Therapyddion Galwedigaethol?

Mae’r tîm Therapi Galwedigaethol ar gyfer Adsefydlu Niwrolegol Arbenigol wedi’i leoli yn y Ganolfan Adsefydlu Anafiadau Madruddyn y Cefn a Niwrolegol Arbenigol yn Ysbyty’r Brifysgol Llandochau ym Mhenarth. Rydyn ni’n gweithio fel rhan o dîm amlddisgyblaethol i drin pobl yn dilyn anaf i’r ymennydd. Rydyn ni’n gweithio gydag unigolion a’u teuluoedd i adnabod cryfderau yn ogystal â meysydd anhawster a sut y gall y rhain effeithio ar eu trefn ddyddiol. Rydyn ni’n gosod nodau ac yn cydweithio drwy’r cynllun adsefydlu tuag at gyflawni’r lefel uchaf bosibl o annibyniaeth a gallu.

Dyma rai o’r ffyrdd y gallwn ni helpu yn dilyn anaf i’r ymennydd:

• Technegau addysgu a gweithgareddau sy’n ymwneud ag annibyniaeth mewn gweithgareddau dyddiol fel ymolchi a gwisgo neu baratoi prydau bwyd
• Strategaethau i helpu gydag anawsterau gwybyddol
• Cefnogaeth mynediad i’r gymuned, er enghraifft i helpu’r unigolyn i ddefnyddio archfarchnadoedd neu drafnidiaeth gyhoeddus
• Help i ddychwelyd i wneud gweithgareddau cymdeithasol a chwaraeon / hobïau
• Cyngor ar offer arbenigol fel cadeiriau olwyn, teclynnau codi, cymhorthion cegin
• Asesiad symud a thrin
• Addasiadau cartref ac asesiadau tai
• Addysg a hyfforddiant i ofalwyr a theuluoedd
• Sblintio i leihau tôn, cyfangiadau a gwella gosodiadau ymarferol

Mae therapyddion hyfforddedig yn asesu unigolion ag anhwylderau ymwybyddiaeth hirdymor. Rydym yn cynnal ystod o asesiadau arbenigol sy’n ceisio nodi ymwybyddiaeth bosibl mewn oedolion sydd â niwed difrifol i’r ymennydd a sefydlu a oes ganddyn nhw unrhyw alluoedd swyddogaethol a chyfathrebu.

Fideos ac adnoddau

Cliciwch yma am gasgliad o fideos, dolenni ac adnoddau sy’n ymdrin â materion a help i’r rhai sy’n gwella o, neu sy’n cael eu heffeithio gan, anaf i’r ymennydd.