Siarad a Chyfathrebu

Mae siarad a chyfathrebu yn defnyddio sgiliau sy’n parhau i ddatblygu a chael eu mireinio drwy gydol ein hoes.

I’r rhan fwyaf o blant, mae sgiliau cyfathrebu yn datblygu’n gyflym dros bum mlynedd gyntaf eu bywyd a gall yr oedolion sydd o’u cwmpas wneud llawer i helpu i gefnogi eu datblygiad. I rai plant, nid yw’r sgiliau hyn bob amser yn datblygu yn ôl y disgwyl ac efallai y bydd angen cymorth ychwanegol arnynt i’w helpu i gyfathrebu.

Er bod y rhan fwyaf o blant yn defnyddio siarad fel ffordd o gyfathrebu, mae rhai plant yn cyfathrebu trwy arwyddo, ystumiau/gweithredu, symbolau neu lyfrau/apiau.

Mae’r gwasanaeth Therapi Iaith a Lleferydd Plant wedi llunio llawer o gynghorion ac awgrymiadau defnyddiol ar sut y gallwch chi gefnogi sgiliau cyfathrebu eich plentyn gartref. Ewch i’r dudalen Therapi Iaith a Lleferydd Plant i gael cyngor sy’n berthnasol i chi a’ch plentyn.

Therapi Iaith a Lleferydd i Blant

Syniadau a strategaethau defnyddiol i helpu eich plentyn

Os yw eich plentyn yn derbyn cymorth gan y Gwasanaeth Therapi Iaith a Lleferydd Plant, dilynwch y cyngor a argymhellir i chi a’ch plentyn. Cysylltwch â ni os hoffech chi drafod hyn eto.

Fel gyda phob un ohonom, mae pa mor effeithiol y mae plant yn cyfathrebu yn gallu dibynnu ar sut maen nhw’n teimlo. Mae defnyddio strategaethau i gefnogi lles emosiynol eich plentyn yn gallu cael effaith gadarnhaol ar ei sgiliau cyfathrebu hefyd.