Therapi Lleferydd ac Iaith a Parkinson’s

Ynglŷn â Parkinson’s 

Mae Clefyd Parkinson yn gyflwr niwrolegol cynyddol. Cewch ragor o wybodaeth ar wefan Parkinson’s UK.  Mae’r fideo hwn gan Parkinson’s UK yn fan cychwyn defnyddiol i gael gwybod beth yw Parkinson’s.  

Dysgwch fwy am arwyddion a symptomau Clefyd Parkinson ar wefan Parkinson’s UK.  

 Mae gan wefan Parkinson’s UK daflen wybodaeth hefyd sy’n esbonio’r gwahanol fathau o Glefyd Parkinson. 

Os ydych chi’n teimlo’n bryderus, wedi’ch llethu neu’n cael trafferth ymdopi, cysylltwch â’ch meddyg teulu sy’n gallu eich cyfeirio at weithiwr gofal iechyd proffesiynol addas. 

Mae rhai unigolion sydd wedi cael diagnosis o Parkinson’s yn gallu profi newidiadau yn eu lleferydd a llyncu wrth i’r cyflwr ddatblygu dros amser. Gall lleferydd yr unigolyn fynd yn aneglur ac yn anodd ei ddeall, a bydd angen mwy o ymdrech i lyncu hylif a bwyd. Dyma rai o’r anawsterau y gall pobl eu profi wrth fwyta ac yfed:

Anawsterau wrth gnoi bwyd
Colli bwyd neu ddiod o flaen y geg
Anawsterau dechrau llyncu
Tagu ar fwyd neu ddiod
Bwyd yn glynu yn y gwddf
Teimlo eu bod yn mygu
Colli pwysau
Heintiau rheolaidd ar y frest
Diffyg anadl ar ôl llyncu

Mae’r Gwasanaeth Therapi Lleferydd ac Iaith yn gallu helpu os byddwch chi’n sylwi ar y newidiadau hyn. Gallwch chi gael eich cyfeirio gan eich meddyg teulu neu nyrs/meddyg arbenigol neu gysylltu â ni’n uniongyrchol drwy e-bost neu ar 02920 743012. 

Mae ymarferion a strategaethau therapi lleferydd ac iaith defnyddiol yn cael eu hargymell o fewn yr ap My Parkinson’s.Os byddwch chi’n chwilio am therapi lleferydd yn y bar chwilio, bydd detholiad o wybodaeth ar gael sy’n archwilio disgrifiadau ac ymarferion i’r llais, awgrymiadau cyfathrebu, llyncu a rheoli poer.

Cymorth Lleol

Grŵp Cardiff Live Loud!

Mae gan dros 80 y cant o bobl â Parkinson’s broblemau llais neu gyfathrebu. Ydych chi’n un ohonyn nhw?

Mae sesiynau Live Loud! yn groesawgar a chefnogol. Maen nhw’n cael eu cynnal gan wirfoddolwyr ac mae gan lawer ohonyn nhw Parkinson’s. Yn y sesiynau gallwch gymryd rhan mewn gweithgareddau sy’n hwyl, yn amrywiol ac sy’n gallu gwella eich hyder i siarad mewn bywyd bob dydd. Mae’r gweithgareddau yn cynnwys ymarferion anadlu, adrodd barddoniaeth a chymryd rhan mewn trafodaethau grŵp. 

Nid oes tâl i fynychu’r grŵp. Mae croeso i bartneriaid a gofalwyr eich cefnogi os oes angen rhywfaint o help arnoch chi.

E-bostiwch Liz Jones am ragor o wybodaeth am y prosiect Live Loud! neu ffoniwch Liz ar 03442253767.