Adsefydlu yn y Ganolfan Aelodau Artiffisial a Chyfarpar (ALAC)

Bydd y Cymhorthyn PPAM a’r Femurett ond yn cael ei ddefnyddio fel rhan o’ch triniaeth adsefydlu yn y Ganolfan Aelodau Artiffisial a Chyfarpar ac ni ellir mynd â nhw adref.

Gellir defnyddio soced wirio hefyd yn ystod triniaeth adsefydlu gynnar. Prosthesis yw hon sy’n galluogi tîm y Ganolfan Aelodau Artiffisial a Chyfarpar i benderfynu ar y ffit a’r cydrannau prosthetig gorau i chi. Wrth ddefnyddio soced wirio, efallai y bydd gweithgareddau na allwch eu gwneud fel dringo grisiau/symud yn yr awyr agored. Mae hyn oherwydd y deunydd y gwneir y soced ohono. Ni ellir mynd â’r soced wirio adref.

Bydd soced derfynol yn cael ei gwneud pan fydd yn briodol. Dyma fydd y prosthesis y gallwch chi fynd adref ag ef. Mae’r amser a gymerir i symud ymlaen o soced wirio i soced derfynol yn amrywio a bydd yn dibynnu ar eich cynnydd.

Bydd disgwyl i chi ddysgu sut i roi eich prosthesis ymlaen a’i dynnu naill ai ar eich pen eich hun neu gyda chymorth eich teulu/gofalwyr.

Os mai’r bwriad yw i chi gerdded gyda’ch prosthesis, byddwch yn dysgu cerdded o fewn y bariau cyfochrog i ddechrau cyn symud ymlaen i gymhorthion cerdded fel ffrâm, baglau penelin neu ffyn cerdded. Bydd y math o gymhorthion cerdded rydych chi’n ei ddefnyddio yn dibynnu ar eich cynnydd a’ch lefel flaenorol o symudedd. Bydd y tîm yn trafod hyn ac yn cytuno arno gyda chi.

Byddwch chi’n gallu mynd â’ch prosthesis gartref pan fyddwch chi a’r Tîm Ffisiotherapi yn teimlo eich bod chi’n barod.

Weithiau gallai Ymweliad Cartref gan Therapydd Galwedigaethol fod o gymorth. Caiff hyn ei drafod â chi a’i gytuno arno gyda chi.

Byddwn yn trafod ac yn cytuno ar nodau unigol gyda chi ar ddechrau eich triniaeth adsefydlu a bydd y rhain yn cael eu hadolygu trwy gydol eich amser gyda ni.

Gall adsefydlu achosi cynnydd mewn poen, er enghraifft poen yn y rhan o’r goes/fraich sy’n weddill, newid mewn poen/teimladau dychmygol, perygl uwch o boen yn rhan isaf y cefn a chyhyrau dolurus trwy ddefnyddio cyhyrau efallai nad ydych wedi’u defnyddio ers tro.Dywedwch wrth y Tîm Ffisiotherapi os byddwch yn profi unrhyw boen cynyddol yn ystod eich triniaeth adsefydlu.

Byddwn yn gwneud ein gorau i ddeall y rheswm dros y poen ac yn darparu cymorth priodol. O bryd i’w gilydd, nid oes modd i ni barhau â’r driniaeth adsefydlu oherwydd poen.

Os oes gennych ddiabetes, bydd angen i chi fonitro lefelau glwcos eich gwaed yn ofalus trwy gydol eich triniaeth adsefydlu. Gall hyn olygu monitro lefelau glwcos eich gwaed cyn/yn ystod ac ar ôl triniaeth adsefydlu gan y gall ymarfer corff effeithio ar y lefelau hyn. Dewch a’ch peiriant monitro glwcos gwaed gyda chi i bob sesiwn.

Os yw lefelau glwcos eich gwaed yn rhy uchel neu’n rhy isel, efallai na fyddwch yn gallu parhau â thriniaeth ar y diwrnod hwnnw.

Mae peryglon i driniaeth adsefydlu. Mae defnyddwyr aelodau artiffisial mewn mwy o berygl o gwympo. “Mae astudiaethau wedi canfod bod 20-53% o bobl y mae rhan o’u cyrff wedi’i thorri i ffwrdd wedi cwympo o leiaf unwaith y flwyddyn” (BACPAR – Canllawiau ar gyfer Atal Cwympo ymhlith Pobl sydd wedi Colli Aelodau Is).

Byddwch yn cael eich annog i roi cynnig ar bob math o weithgareddau gwahanol fel rhan o’ch triniaeth adsefydlu. Diben hyn yw eich paratoi ar gyfer defnyddio’ch prosthesis gartref ac yn y gymuned leol.

Gall eich triniaeth adsefydlu gynnwys cerdded yn yr awyr agored. Yn wahanol i’r Gampfa Ffisiotherapi ni ellir rheoli’r amgylchedd allanol, felly bydd rhaid symud yn ofalus yn yr awyr agored.

Gall y perygl o anaf trwy gwympo fod yn uwch wrth gynnal triniaeth adsefydlu yn yr awyr agored.Gall y perygl o gwympo hefyd fod yn uwch wrth ddefnyddio rhai mathau o aelodau artiffisial megis prosthesis gyda phen-glin rhydd. Bydd Tîm y Ganolfan Aelodau Artiffisial a Chyfarpar yn tynnu eich sylw at hyn.

Byddwch yn cael gwybodaeth am gwympo yn ystod eich triniaeth adsefydlu. Efallai y bydd y Tîm Ffisiotherapi’n gofyn i chi ymarfer codi o’r llawr fel rhan o’ch triniaeth adsefydlu. Os oes unrhyw weithgareddau megis ymarfer symud yn yr awyr agored/cwympo nad ydych yn teimlo’n gyfforddus wrth eu gwneud, rhowch wybod i’r Tîm Ffisiotherapi.

Mae adsefydlu trwy ddefnyddio aelod artiffisial yn gofyn am gynnydd sylweddol mewn egni. Mae hyn yn cynyddu pan fo mwy’n cael ei dorri i ffwrdd o aelod (Barsby P [1995]: Amputee Management).

Gall hyn roi straen ar eich calon/ysgyfaint gan achosi problemau fel diffyg anadl cynyddol a chynnydd yng nghyfradd curiad y galon. Dywedwch wrth y Tîm Ffisiotherapi os ydych chi’n teimlo’n fyr o wynt i’r pwynt lle mae’n anghyfforddus, yn cael poen yn y frest neu’n dioddef unrhyw symptomau eraill yn ystod neu ar ôl eich triniaeth.

O bryd i’w gilydd, nid oes modd i ni barhau â’r driniaeth adsefydlu oherwydd y straen ar y corff.

Gall adsefydlu achosi dirywiad yng nghroen eich aelod sydd wedi’i dorri i ffwrdd, gan achosi i’r croen chwalu. Byddwn yn monitro eich croen yn agos yn ystod y driniaeth adsefydlu. Bydd angen i chi hefyd fonitro eich aelod wedi’i dorri i ffwrdd yn ofalus rhwng sesiynau adsefydlu. Dywedwch wrth dîm y Ganolfan Aelodau Artiffisial a Chyfarpar os bydd gennych unrhyw broblemau yn ystod neu ar ôl eich triniaeth adsefydlu.

O bryd i’w gilydd, nid oes modd i ni barhau â’r driniaeth adsefydlu oherwydd problemau gyda’r croen.

Efallai y byddwch yn cael problemau gyda’ch aelod sy’n weddill yn ystod triniaeth adsefydlu a gallai’r driniaeth achosi i’r croen chwalu. Os nad yw’r croen yn gwella, gallai hyn arwain at dorri mwy o’r aelod i ffwrdd. Byddwn yn monitro eich croen yn ofalus yn ystod y driniaeth adsefydlu. Bydd angen i chi hefyd fonitro eich aelod wedi’i dorri i ffwrdd yn ofalus rhwng sesiynau adsefydlu. Rhowch wybod wrth y tîm os ydych yn sylwi ar unrhyw broblemau neu newidiadau yn eich aelod sy’n weddill.

Gall adsefydlu hefyd achosi mwy o straen ar y fraich sy’n weddill o ran unrhyw broblemau sy’n bodoli eisoes fel arthritis. Dywedwch wrth dîm os bydd gennych unrhyw broblemau yn ystod neu ar ôl eich triniaeth adsefydlu.

O bryd i’w gilydd, nid oes modd i ni barhau â’r driniaeth adsefydlu oherwydd y problemau a nodwyd uchod.