Talipes Calcaneovalgus Lleoliadol

Mae’r cyflwr yn cael ei ddiagnosio drwy archwilio traed y babi.

Fel arfer bydd yn gwella o fewn ychydig fisoedd wrth i’r baban gael mwy o le i symud ac ymestyn ei draed. Mae rhai ymarferion a gweithgareddau syml yn gallu gwella lleoliad y droed.

Y cyngor yw peidio â defnyddio babygro tyn, teits, sanau nac esgidiau sy’n cyfyngu symudiad y droed a’r pigwrn.

Gwnewch yr ymarferion syml hyn ar droed eich baban pan fydd wedi ymlacio.

Gwnewch bob ymarfer am 10-30 eiliad, os yw eich baban yn gyffyrddus. Ddylai’r ymarfer ddim bod yn boenus. Gallwch wneud yr ymarferion yn rheolaidd trwy gydol y dydd, er enghraifft, bob tro y byddwch yn newid cewyn eich babi.

Ymarfer un

• Defnyddiwch eich bysedd a’ch bawd i ddal rhan uchaf y droed gyda’r pen-glin wedi’i blygu.
• Symudwch y droed i’r canol fel ei bod yn unionsyth â gweddill y goes.
• Gan ddefnyddio’r llaw arall, tylinwch ran uchaf y pigwrn.

Ymarfer dau

• Defnyddiwch eich bysedd a’ch bawd i ddal troed eich baban.
• Symudwch y droed i mewn tuag at y canol, gyda’r bysedd traed yn pwyntio i lawr
• Cofiwch fod traed babanod yn hyblyg iawn ac yn gallu symud llawer

Ymarfer tri

• Coswch ymyl fewnol troed eich baban o’r bys bach hyd at asgwrn y sawdl, o amgylch y pigwrn ac i fyny rhan fewnol y goes isaf.
• Bydd hyn yn helpu’r baban i symud ei gyhyrau er mwyn troi’r droed tuag at i mewn.

Bydd eich baban yn cael ei gyfeirio am apwyntiad ffisiotherapi er mwyn adolygu cynnydd y traed.

Mae’n ddigon arferol i achosion gael eu cyfeirio am sgan uwchsain ar y glun. Siaradwch â’ch ymwelydd iechyd os oes angen mwy o wybodaeth arnoch.