Deiet a Sglerosis Ymledol
I’r rhan fwyaf o bobl sydd â Sglerosis Ymledol (MS), mae’r deiet gorau yn un iach ac amrywiol.
Y pwyntiau allweddol yw:
- Gallai deiet cytbwys a phwysau iach eich helpu i reoli eich MS.
- Anelwch am ddeiet cytbwys fel eich bod yn cael digon o’r prif faetholion: carbohydradau, brasterau, proteinau, fitaminau a mwynau.
- Nid oes ‘deiet MS’ sydd wedi’i brofi i helpu i drin sglerosis ymledol. Mae dietau arbennig/amgen fel The Swank, McDougall, Paleo neu Best Bet yn gwahardd rhai bwydydd, felly os ydych yn rhoi cynnig arnyn nhw, byddwch yn ofalus i beidio â cholli maetholion hanfodol.
- Gwnewch gynllun ar gyfer eich deiet sy’n helpu eich anghenion personol eich hun – i helpu gyda blinder, y bledren neu’r coluddyn, anawsterau llyncu neu gadw pwysau iach.
- Os oes angen help arnoch gyda phrydau bwyd – gyda chynllunio, siopa, paratoi neu glirio – gofynnwch i’ch Meddyg Teulu neu’ch nyrs MS am asesiad therapydd galwedigaethol ac atgyfeiriad at ddeietegydd. Gallan nhw helpu i sicrhau y gallwch gael deiet da, a’ch helpu i fwyta’n iach o fewn eich cyllideb.
Mae gan y fideo hwn wybodaeth ddefnyddiol am fwyta deiet cytbwys:
Os hoffech gael rhagor o gymorth gyda’ch deiet, neu os hoffech gael help i reoli eich pwysau (naill ai os ydych dan bwysau neu dros bwysau), yna gofynnwch i’ch Meddyg Teulu neu’ch tîm MS eich cyfeirio at ddeietegydd am gyngor unigol.
