Offer y gallech chi eu gweld mewn gofal critigol

Dyma ddisgrifiad byr o wahanol offer y gallech chi eu gweld yn yr uned gofal critigol. Os oes offer sydd ddim yn cael eu hamlinellu isod neu os ydych chi’n ansicr am yr hyn y mae offer yn ei wneud, siaradwch â’r nyrs wrth erchwyn eich gwely a fydd yn gallu esbonio.

Peiriant anadlu

Mae’n cefnogi anadlu drwy roi ocsigen i’r ysgyfaint a thynnu carbon deuocsid o’r corff pan fo claf yn rhy sâl neu’n rhy gysglyd i wneud hynny ei hun. Bydd gan gleifion diwb fel bod y peiriant anadlu yn gallu rhoi cymorth anadlu. Gellir gosod hwn drwy’r geg ac i mewn i’r bibell wynt (tiwb endotraceaidd) neu ei osod yn uniongyrchol yn y bibell wynt (tiwb traceostomi).

Wrth i gleifion wella, efallai na fyddant angen y peiriant anadlu ond hwyrach y bydd angen cefnogaeth anadlu o hyd. Bydd y tîm yn egluro’r gwahanol fathau o gymorth anadlu sydd ar gael i gleifion wrth i’r rhain newid yn ystod arhosiad y claf.

Tiwb endotraceaidd

Tiwb sy’n rhoi cymorth anadlu o’r peiriant anadlu i’r claf. Mae’n cael ei osod drwy’r geg ac i mewn i’r bibell wynt.

Tiwb traceostomi

Tiwb sy’n rhoi cymorth anadlu o’r peiriant anadlu i’r claf. Mae’n cael ei osod yn uniongyrchol yn y bibell wynt.

Uned sugno

Mae’n helpu i glirio secretiadau o’r llwybr anadlu pan na fydd cleifion yn gallu gwneud hynny eu hunain.

Monitor wrth erchwyn y gwely

Mae’n monitro gwybodaeth hanfodol yn gyson, e.e. cyfradd curiad y galon, rhythm y galon, pwysedd gwaed a lefelau ocsigen.

Siart arsylwi

Yma mae gwybodaeth hanfodol am ein cleifion, fel pwysedd gwaed, cyfradd curiad y galon, allbwn wrin a thrwythiadau cyffuriau yn cael ei dogfennu. Gall hyn fod ar bapur neu ar gyfrifiadur.

Pympiau

Maen nhw’n rhoi hylifau, meddyginiaethau a bwyd i’n cleifion.

Larymau

Mae larymau yn rhoi rhybudd i nyrsys os oes newidiadau yng nghyflwr ein cleifion ac yn caniatáu i ni wneud addasiadau rheolaidd i ofal cleifion. Nid yw hynny o reidrwydd yn golygu bod rhywbeth o’i le. Gall y nyrs wrth erchwyn y gwely esbonio’r gwahanol larymau a’r offer i unrhyw un sy’n ymweld â’r uned.

Cathetr gwythiennol canolog

Mae’n cael ei osod yn un o’r gwythiennau mawr canolog er mwyn gallu rhoi gwahanol feddyginiaethau ar yr un pryd. Gellir ei ddefnyddio hefyd i roi maeth os nad yw perfedd claf yn gweithio’n iawn.

Cathetr rhydwelïol

Tiwb tenau sy’n cael ei osod mewn rhydweli. Gellir monitro pwysedd gwaed yn gyson ac mae modd cymryd samplau gwaed yn rheolaidd.

Tiwbiau bwydo

Y math mwyaf cyffredin yw tiwb trwyn i’r stumog sy’n cael ei osod drwy’r ffroen, i lawr y corn gwddf ac i mewn i’r stumog. Math arall o diwb bwydo yw tiwb trwyn i’r jejwnwm sy’n cael ei osod drwy’r ffroen, i lawr y corn gwddf ac i mewn i’r coluddyn bach. Os oes angen bwyd artiffisial tymor hir ar gleifion, efallai bydd tiwb yn cael ei fewnosod i’r abdomen ac yn uniongyrchol i’r stumog (tiwb gastrostomi) neu’r coluddyn bach (tiwb jejwnostomi).