Bynions (Juvenile Hallux Valgus)
Mae plant yn gallu dioddef gyda bynions.
Juvenile Hallux Valgus yw’r enw ar fynions sy’n datblygu yn ystod plentyndod.
Lwmp mawr yw bynion, sy’n datblygu ar ymyl fewnol y droed lle mae’r bawd yn cwrdd â phen y droed a’r bawd yn gwyro tuag at y bysedd eraill.
Beth sy’n achosi Symptomau Hallux Valgus?
Symptomau
Diagnosis
Triniaeth
Beth sy’n achosi Symptomau Hallux Valgus?
Does neb yn gwybod yn iawn pam mae Juvenile Hallux Valgus yn digwydd.
Mae’r anhwylder hwn yn tueddu i redeg mewn teuluoedd. Mae pobl ifanc sydd â thraed fflat-wadn a/neu hyblyg yn fwy tebygol o gael anffurfiad bynion.
Mae plant sydd â phroblemau niwrolegol sylfaenol yn fwy tebygol o ddatblygu’r cyflwr hwn hefyd.
Symptomau
Mae Juvenile Hallux Valgus yn achosi lwmp ar ymyl fewnol y droed, ar gymal y bawd, gyda’r bawd yn gwyro tuag at y bysedd eraill.
Mae’r lwmp yn gallu bod yn boenus iawn i rai plant. Yn aml, bydd gwisgo esgidiau cul yn annifyr a bydd ganddynt boen wrth gerdded.
Diagnosis
Gall Podiatregydd ddiagnosio Juvenile Hallux Valgus trwy wneud archwiliad corfforol.
Triniaeth
Argymhellir gofal cadwrol cynnar. Mae dulliau cadwrol (heb lawdriniaeth) yn helpu’r symptomau.
Esgidiau
Un cyngor yw gwisgo esgidiau blaen llydan gyda sodlau isel fel nad ydyn nhw’n rhoi gormod o bwysau ar y lwmp neu’n gwneud y cyflwr yn waeth.
Mewnwadnau
Gall mewnwadnau/orthoses helpu i wella safle’r droed y tu mewn i esgidiau, yn enwedig mewn plant â thraed fflat-wadn. Efallai y rhoddir presgripsiwn cryfhawyr bysedd traed neu bropiau bysedd traed hefyd.
Y dewis olaf un fydd llawdriniaeth
Dyw llawdriniaeth ar gyfer bynions sydd ddim yn boenus, dim ond er mwyn newid ymddangosiad y droed, ddim yn cael ei hargymell.
Os oes gan eich plentyn broblem nad yw’n gwella fel y byddech chi’n disgwyl gyda hunanofal, dylech gysylltu â gweithiwr gofal iechyd proffesiynol i gael cyngor. Gallai hyn fod yn feddyg teulu, fferyllydd, Gwasanaeth Podiatreg y GIG neu Bodiatrydd Preifat.
Gwnewch yn siwr fod eich podiatrydd wedi cofrestru â’r Cyngor Proffesiynau Iechyd a Gofal ac edrychwch am y llythrennau HCPC ar ôl ei (h)enw.
