Rydym yn darparu gwasanaeth ffisiotherapi arbenigol i blant a phobl ifanc sy’n byw yng Nghaerdydd a Bro Morgannwg.

Mae gennym ddealltwriaeth helaeth o ddatblygiad plant a chyflyrau plentyndod, gan gynnwys problemau datblygiadol, niwrolegol a chyhyrysgerbydol.  

Ein nod yw helpu plant i wneud y mwyaf o’u galluoedd ac annog adferiad yn dilyn salwch, anabledd neu anaf. Rydym yn eu helpu i wella ac adfer gallu drwy weithgareddau corfforol megis ymarfer corff a symud, yn ogystal â darparu cyngor ac adnoddau arbenigol.

Gallwn ddarparu’r canlynol: 

• Asesiad a thriniaeth ffisiotherapi 
• Mynediad at gyfleusterau arbenigol, os yw’n addas, megis hydrotherapi 
• Mewnbwn ffisiotherapi mewn amrywiaeth o leoliadau, yn seiliedig ar anghenion y plentyn, gan gynnwys y cartref, meithrinfa neu ysgol 
• Hyfforddiant a chyngor arbenigol i rieni, gofalwyr a’r rhai sy’n ymwneud â’r plentyn 
• Asesiad ar gyfer ffisiotherapi arbenigol a darparu offer pan fydd angen 
• Cydweithio â gweithwyr proffesiynol eraill ym maes iechyd, addysg a gofal cymdeithasol 

Beth i’w ddisgwyl gan eich Ffisiotherapydd Pediatrig?  

I ddechrau, bydd angen i ni gwblhau asesiad o’ch plentyn neu berson ifanc, yn seiliedig ar y rheswm dros ei gyfeirio. Mae hyn yn cynnwys casglu gwybodaeth gan rieni neu warcheidwaid cyfreithiol a ffynonellau eraill. Efallai y bydd angen i ni gynnal arsylwad ac archwiliad corfforol, gan edrych ar gryfder a chydlynu’r plentyn, datblygiad echddygol, ystum, cydbwysedd a galluoedd gweithredu.  

 Yn dilyn asesiad, penderfynir a fydd y plentyn neu’r person ifanc yn debygol o elwa o gyfnod o ofal Ffisiotherapi. Byddwn yn trafod dewisiadau triniaeth gyda’n gilydd ac yn cytuno ar nodau therapi clir, realistig. Mae’n bwysig bod rhieni/gwarcheidwaid cyfreithiol yn cael eu hysgogi i annog eu plentyn i gyflawni’r rhaglen Ffisiotherapi.  

 Gall hyn gynnwys gweithgareddau, ymarferion neu gyngor penodol i’w gwneud yn y cartref, yr ysgol neu’r feithrinfa.  

Rydym yn darparu asesiad ffisiotherapi a thriniaeth mewn cyfnodau o ofal. Mae hyn yn golygu y byddan nhw’n cael eu rhyddhau ar ôl cwrs o fewnbwn Ffisiotherapi. Os oes angen mewnbwn Ffisiotherapi pellach ar eich plentyn yn ddiweddarach, gellir ei ailgyfeirio, neu ei hunangyfeirio yn ôl i’r gwasanaeth Ffisiotherapi  

Atgyfeiriadau  

Gall gweithiwr gofal iechyd proffesiynol eich atgyfeirio yn dilyn asesiad, er enghraifft eich meddyg teulu, Ymwelydd Iechyd neu Therapydd Galwedigaethol.  

Fel arfer bydd gwasanaethau Ffisiotherapi Cymunedol yn cael eu darparu o ddydd Llun i ddydd Gwener, rhwng 8.30am a 4.30pm.