Rheoli amser sgrin eich plentyn

Mae’n ymddangos bod gormod o amser sgrin yn cael effaith negyddol ar blant a phobl ifanc. Mae’n gysylltiedig â lles a phryderon emosiynol, a materion corfforol fel cysgu’n wael a gordewdra.

Mae plant angen amrywiaeth eang o brofiadau bywyd go iawn er mwyn tyfu a datblygu.

Mae’r rhain yn cynnwys:

• Chwarae corfforol a chwarae ‘cwffio’ er mwyn datblygu eu cyrff.
• Chwarae blêr a rhyngweithio â’r amgylchedd er mwyn datblygu eu systemau synhwyraidd.
• Cymryd tro a thrafod gyda ffrindiau er mwyn datblygu eu sgiliau cymdeithasol.

Mae’n bosibl bod plant sy’n treulio gormod o amser o flaen sgrin yn colli’r cyfle i gael amrywiaeth gyfoethog o brofiadau chwarae a dysgu sy’n hanfodol ar gyfer datblygiad iach. Mae hyn yn gallu arwain at nifer o heriau neu anawsterau.

Mae sgriniau yn rhoi boddhad mawr iddyn nhw a bydd rhai plant yn ceisio dewis y rhain cyn dewis gweithgareddau eraill. Mae plant sy’n treulio llawer o amser yn defnyddio sgriniau yn gallu ei chael hi’n anoddach ymgysylltu â theganau a sefyllfaoedd “bywyd go iawn”.

Mae’n bosibl bod plant sy’n treulio llawer o amser o flaen sgriniau yn cael llai o gyfleoedd i chwarae a gwneud ymarfer corff sy’n hanfodol ar gyfer datblygiad eu cyrff a’u hymennydd.

Ceir canllawiau cenedlaethol sy’n argymell lefelau gweithgareddau plant a phobl ifanc er mwyn cefnogi eu datblygiad a’u cadw’n iach. Mae lefelau gweithgareddau llawer o blant yn is na’r hyn a argymhellir ac efallai bod gormod o amser sgrin yn cyfrannu at hyn.

Cliciwch yma i weld Canllawiau Gweithgaredd Corfforol Plant o dan 5 oed

Cliciwch yma i weld Canllawiau Gweithgaredd Corfforol Plant dros 5 oed a Phobl Ifanc.

Mae treulio amser ar-lein yn lleihau cyfleoedd rhyngweithio ”bywyd go iawn” eich plentyn. Wrth chwarae gydag eraill, mae plant yn dysgu sut i ryngweithio, rhannu a chymryd tro. Mae amser sgrin yn lleihau’r cyfleoedd hyn.

Cliciwch yma am wybodaeth am ‘Sut alla i ddysgu sgiliau cymdeithasol i fy mhlentyn?

Mae cysylltiad rhwng treulio llawer o amser yn edrych ar sgrin a thrafferthion cysgu. Mae plant angen digon o gwsg i’w helpu i ddysgu, chwarae a datblygu.

Cliciwch yma am ragor o wybodaeth a chyngor ar sut mae defnyddio sgrin yn effeithio ar gwsg

Dangoswyd bod bwyta o flaen sgrin yn effeithio ar faint rydyn ni’n ei fwyta a’n gallu i wybod pan fyddwn ni’n llawn a / neu wedi cael digon o fwyd. Mae astudiaethau wedi dangos bod pobl yn bwyta mwy pan fyddan nhw o flaen sgrin o gymharu â bwyta heb sgrin o’u blaenau.

Pan fyddwn ni’n bwyta o flaen sgrin, mae’n anoddach rhoi sylw i’r hyn yr ydyn ni’n ei fwyta a faint – efallai y bydd plant yn dod yn gyfarwydd â’r arfer o fwyta heb roi sylw i’r bwyd sy’n gallu arwain at orfwyta ac ennill pwysau. Mae sgriniau yn gallu dangos mwy o hysbysebion bwyd sothach i blant hefyd.

• Ceisiwch annog eich plentyn i beidio â bwyta o flaen sgrin.
• Gwnewch ardaloedd di-sgrin ar gyfer prydau a byrbrydau er mwyn i’ch plentyn orfod dod oddi wrth y sgrin ac aros oddi wrthi wrth fwyta.
• Ceisiwch fwyta prydau bwyd fel teulu gyda’ch gilydd heb sgrin yn rheolaidd. Mae’n bwysig bod oedolion yn modelu’r ymddygiad maen nhw eisiau ei weld yn eu plant.

• Gosodwch esiampl dda gyda’ch defnydd sgrin eich hun
• Os yw eich plentyn yn ddigon hen, siaradwch gyda’ch gilydd am yr amser y mae’n ei dreulio ar-lein er mwyn iddo ddeall eich pryderon
• Gwnewch gytundeb teuluol sy’n nodi pryd a pha mor hir y mae eich plant yn gallu defnyddio sgriniau
• Dewiswch ardaloedd “di-sgrin” yn y cartref – efallai mai ystafell wely’r plentyn fydd un ohonyn nhw, neu’r ystafell fwyta neu’r gegin
• Defnyddiwch dechnoleg rheolaeth rhieni i osod cyfyngiadau ar fynediad i ddyfeisiau
• Sicrhewch fod cyfleoedd a gweithgareddau chwarae eraill ar adegau pan fyddwch chi eisiau annog eich plentyn i beidio defnyddio dyfais. Holwch pa weithgareddau neu glybiau ar ôl ysgol sydd yn yr ardal, neu gwnewch amser i chwarae gyda phlant iau sy’n cael trafferth difyrru eu hunain efallai.