Cwestiynau Cyffredin – Therapi Galwedigaethol i Blant a Phobl Ifanc

Ffoniwch dîm gweinyddol Therapi Galwedigaethol ar 02921 836910 er mwyn gallu gwneud Cais am Gymorth.

• Bydd eich cais yn cael ei frysbennu i weld sut y gall ein gwasanaeth helpu. Efallai y byddwch chi’n cael eich cyfeirio at gyngor yn y lle cyntaf neu bydd eich cais a’ch pryder yn cael eu trosglwyddo i wasanaeth arall.
• Os mai ni yw’r gwasanaeth cywir all eich helpu, byddwch chi’n derbyn llythyr ‘optio i mewn’ a fydd yn eich cyfeirio at yr adnoddau a’r fideos ar y wefan hon cyn eich asesiad ffôn cychwynnol. Mae’n bwysig eich bod chi’n ymateb i’r llythyr hwn o fewn pythefnos.
• Yna byddwch chi’n cael asesiad ffôn cychwynnol gyda Therapydd Galwedigaethol lle byddwn yn trafod proffil galwedigaethol eich plentyn gyda chi. Mae hyn yn ymdrin â phethau y mae’ch plentyn yn eu gwneud yn ystod y dydd. Bydd hyn yn cynnwys gweithgareddau hunan-ofal (ymolchi, brwsio dannedd, mynd i’r toiled), gwisgo, ysgrifennu, defnyddio cyllyll a ffyrc. Byddwn yn edrych ar gryfderau a diddordebau eich plentyn a’r meysydd yr hoffech eu datblygu. Does dim angen i ni weld eich plentyn bob tro a gall y cyngor hwnnw gael ei roi yn dilyn galwad ffôn er mwyn i chi ei weithredu gartref.
• Weithiau bydd angen i ni gwrdd â’ch plentyn wyneb yn wyneb. Gallai hyn fod yn ymweliad yn yr ysgol, ymweliad yn y cartref, asesiad mewn clinig (naill ai yng Nghanolfan Plant Llandochau neu Dewi Sant) neu asesiad eistedd yn ein storfeydd offer. Bydd rhai yn asesiadau untro neu weithiau rydym yn cynnig sesiynau dilynol.
• Ar ddiwedd y sesiwn/sesiynau, byddwch yn cael eich rhyddhau o’r gwasanaeth gydag unrhyw wybodaeth ysgrifenedig sydd ei hangen arnoch i barhau i weithio ar y nodau galwedigaethol y cytunwyd arnynt gyda’ch plentyn. Byddwn hefyd yn sicrhau eich bod yn gwybod sut i ddod yn ôl atom i gael cyngor a chymorth pellach os bydd angen i chi wneud hynny yn y dyfodol.

Gallwch chi wneud Cais am Gymorth drwy ffonio ein tîm gweinyddol ar 02921 836910. Byddan nhw’n gofyn i chi beth yw eich pryderon am eich plentyn a’i ymgysylltiad galwedigaethol a’r hyn yr ydych wedi rhoi cynnig arno eisoes.

Rydym yn eich annog i wylio ein fideos i’ch helpu i ddeall sut y gallwn helpu eich plentyn. Gyda’ch caniatâd, gall staff ysgol ac unrhyw weithwyr gofal iechyd proffesiynol sy’n ymwneud â’ch plentyn hefyd wneud Cais am Gymorth yn yr un modd.

Cysylltwch â thîm gweinyddol Therapi Galwedigaethol ar 02921 836910

Ffoniwch y Gwasanaeth Offer ar y Cyd ar: 02920 873673 / 02920 712555  

Mae llinell gymorth yn agor yn 2023 lle gallwch chi ffonio am sgwrs neu gallwch chi wneud Cais am Gymorth drwy ffonio ein tîm gweinyddol ar 02921 836910.

Rydym yn croesawu eich adborth, cliciwch yma i lenwi ein ffurflen adborth fer. Diolch am eich adborth.