Bysedd Traed yn troi i Mewn

Mae traed rhai plant yn troi am i mewn pan fyddan nhw’n cerdded. Mae’n beth cyffredin iawn ymhlith plant ifanc. Mae’n un o’r ystumiau traed mwyaf arferol mewn plant. 

Mae 3 phrif reswm pam mae rhai plant iach yn cerdded gyda’u traed yn troi i mewn: 

Blaendroad Ffemwrol

Dyma’r achos mwyaf cyffredin o draed wedi’u troi i mewn ac mae’n gallu rhedeg mewn teuluoedd. Bydd asgwrn y glun (asgwrn y forddwyd) yn troi i mewn gan achosi i’r goes gyfan droi i mewn. Mae’n fwyaf amlwg mewn plant rhwng 2-4 oed ac fel arfer yn gwella cyn iddyn nhw gyrraedd 8-10 oed. 

Metatarsws ‘Adductus’

Mae hyn yn aml yn cael ei achosi ar ôl i faban fod mewn lle cyfyng yn y groth ac mae’n bosibl ei weld yn syth ar ôl y geni. Mae’n gwella dros amser fel arfer ond mewn achosion difrifol lle mae’r droed yn anystwyth ac yn anhyblyg, efallai y bydd angen esgidiau arbenigol, ymestyniadau neu weld arbenigwr.

Dirdro Crimogol

Mae hyn yn digwydd pan fydd y pengliniau’n wynebu ymlaen ond asgwrn y grimog wedi’i ddirdroi, gan achosi i’r droed droi i mewn. Yn gyffredinol, mae’n gwella erbyn 4-5 oed.

Gwisgo esgidiau o ansawdd da sy’n ffitio’n iawn.

Mae’n bwysig bod plant yn chwarae a bod yn egnïol er mwyn i’w hesgyrn dyfu a datblygu sgiliau symud. Mae chwaraeon cyffredinol fel nofio yn llesol.

Gwneud gweithgareddau i gryfhau cyhyrau’r glun, fel cerdded gyda’r bysedd traed wedi’u troi am allan (fel pengwyn) ac ymarferion ymestyn llinyn y gar. Anogwch eich plentyn i beidio eistedd mewn siâp ‘W’, lle mae’r pen ôl, y pengliniau a’r traed yn cyffwrdd â’r ddaear a’r traed yn gorffwys y tu allan i’r pengliniau.